شادی سے انکار پر عورت کا قتل؛ سپریم کورٹ نے بڑا فیصلہ جاری کردیا

اسلام آباد: سپریم کورٹ نے شادی سے انکار پر خاتون میمونہ شاہین کو قتل کرنے والے مجرم محمد کامران کی سزائے موت برقرار رکھتے ہوئے نظرثانی درخواست مسترد کردی۔ عدالت نے واضح کیا کہ شادی سے انکار عورت کا بنیادی حق ہے اور اسے قتل کا جواز نہیں بنایا جاسکتا۔

عدالت عظمیٰ نے اپنے فیصلے میں قرار دیا کہ شادی سے انکار پر کسی خاتون کو قتل کرنا سنگین جرم ہے اور اس عمل کو سزا میں تخفیف کی بنیاد نہیں بنایا جاسکتا۔

سپریم کورٹ کے مطابق مجرم محمد کامران کی جانب سے آئین کے آرٹیکل 188 کے تحت دائر نظرثانی درخواست میں سابقہ فیصلے میں کوئی واضح قانونی غلطی ثابت نہیں کی جاسکی، اس لیے اسے ریلیف دینے کی کوئی بنیاد موجود نہیں۔

فیصلے میں سزائے موت کے قیدیوں کی سزا میں تبدیلی سے متعلق قانونی اصولوں کی بھی وضاحت کی گئی۔ عدالت نے قرار دیا کہ محض 14 یا 15 سال قید گزار لینے سے سزائے موت کے مجرم کو سزا میں کمی یا تبدیلی کا خودکار حق حاصل نہیں ہوجاتا۔

عدالت کے مطابق اصولِ متوقع عمر کے تحت رعایت کے لیے کم از کم 25 سال قید مکمل کرنے کے ساتھ دیگر قانونی شرائط پوری کرنا بھی ضروری ہے۔ طویل عرصے تک قید میں رہنے کا اصول ہر سزائے موت کے مجرم پر یکساں طور پر لاگو نہیں ہوتا اور اس بنیاد پر خودکار ریلیف نہیں دیا جاسکتا۔

سپریم کورٹ نے مزید واضح کیا کہ عمر قید اور سزائے موت کے قیدیوں کی قانونی حیثیت مختلف ہے، اس لیے دونوں پر یکساں اصول لاگو نہیں کیے جاسکتے۔

اس اہم مقدمے کا فیصلہ جسٹس ہاشم خان کاکڑ نے تحریر کیا۔