منڈی مدرسہ میں دکانداروں کی مبینہ من مانی، اشیائے ضروریہ سرکاری نرخوں سے مہنگی فروخت ہونے کی شکایات

منڈی مدرسہ(عبدالقادر فاروقی) منڈی مدرسہ میں دوکانداروں نے مرضی کے نرخ نافذ کردئیے، عوام پریشان ، انتظامیہ ٹھنڈے دفاتر تک محدود ۔ اصلاح احوال کا مطالبہ۔
منڈی مدرسہ میں مہنگائی نے غریب اور متوسط طبقے کی کمر توڑ کر رکھ دی ہے۔ فروٹ، سبزی، دودھ، دہی اور ایل پی جی سمیت روزمرہ استعمال کی اشیاء مبینہ طور پر سرکاری نرخ ناموں سے زائد قیمتوں پر فروخت ہونے کی شکایات سامنے آ رہی ہیں، جس کے باعث شہری شدید پریشانی کا شکار ہیں۔ ایک طرف بڑھتی ہوئی مہنگائی نے عوام کے لیے دو وقت کی روٹی کا حصول مشکل بنا دیا ہے تو دوسری جانب اشیائے ضروریہ کی قیمتوں پر سرکاری نرخ ناموں کے مطابق عمل درآمد نہ ہونے کے الزامات نے انتظامی کارکردگی پر سوالیہ نشان لگا دیا ہے۔ شہریوں کا کہنا ہے کہ اگر سرکاری نرخ نامے جاری کیے جاتے ہیں تو پھر بازاروں میں ان پر عمل درآمد کیوں یقینی نہیں بنایا جا رہا ہے شہریوں کا کہنا ہے یہ انتظامیہ کی مبینہ غفلت ہے یا نگرانی کا فقدان؟ شہریوں کی جانب سے متعلقہ حکام سے سوال کیا جا رہا ہے کہ قیمتوں کو کنٹرول کرنے اور ناجائز منافع خوری روکنے کی ذمہ داری کس کی ہے؟ اگر دکاندار سرکاری نرخوں سے زائد قیمتیں وصول کر رہے ہیں تو ان کے خلاف مؤثر کارروائی کیوں نظر نہیں آتی۔ شہریوں نے ڈپٹی کمشنر بہاولنگر اور متعلقہ پرائس کنٹرول حکام سے مطالبہ کیا ہے کہ بازاروں میں فوری اور مؤثر چیکنگ کی جائے، سرکاری نرخ نامے نمایاں مقامات پر آویزاں کروائے جائیں، خلاف ورزی کرنے والوں کے خلاف قانون کے مطابق کارروائی کی جائے اور عوام کو مقررہ نرخوں پر اشیائے ضروریہ کی فراہمی یقینی بنائی جائے ۔