شاہ رخ اور سلمان خان کو نہیں پہچانتے تھے مادھوری کے شوہر، شادی کے استقبالیے کا دلچسپ قصہ سامنے آگیا

بالی ووڈ اداکارہ مادھوری ڈکشٹ کے شوہر ڈاکٹر شری رام نینے نے انکشاف کیا ہے کہ وہ اپنی شادی کے استقبالیے میں شاہ رخ خان اور سلمان خان سمیت کئی بڑے فلمی ستاروں کو پہچان نہیں سکے تھے۔ ان کے مطابق وہ صرف امیتابھ بچن کو جانتے تھے، کیونکہ انہوں نے ان کی فلم ’امر اکبر انتھونی‘ دیکھی تھی۔
یہ دلچسپ انکشاف فلم ساز اور کوریوگرافر فرح خان کے کوکنگ وی لاگ کے دوران سامنے آیا، جب وہ مادھوری ڈکشٹ اور ان کے شوہر کے گھر گئیں اور ان سے گفتگو کی۔
ڈاکٹر شری رام نینے نے بتایا کہ شادی کے استقبالیے میں بالی ووڈ کی متعدد معروف شخصیات شریک تھیں، لیکن وہ ان میں سے زیادہ تر کے نام اور چہرے نہیں جانتے تھے۔ انہوں نے اس صورتِ حال کو دلچسپ انداز میں بیان کرتے ہوئے کہا کہ انہیں ایسا محسوس ہورہا تھا جیسے وہ کسی اسکول کے پروم کے بادشاہ ہوں، جہاں وہ لوگوں کی طرف ہاتھ ہلا رہے تھے، مگر انہیں معلوم نہیں تھا کہ سامنے موجود شخصیات کون ہیں۔
فرح خان نے جب ان سے پوچھا کہ کیا وہ شاہ رخ خان اور سلمان خان کو بھی نہیں پہچانتے تھے تو ڈاکٹر نینے نے تصدیق کی کہ وہ دونوں اداکاروں سے بھی واقف نہیں تھے۔ تاہم ان کا کہنا تھا کہ تقریب میں موجود فلمی ستاروں نے ان کے ساتھ محبت اور خوش اخلاقی سے برتاؤ کیا۔
گفتگو کے دوران مادھوری ڈکشٹ سے شادی کی کہانی بھی زیرِ بحث آئی۔ فرح خان نے ڈاکٹر نینے سے پوچھا کہ کیا وہ شادی کی پیشکش کے وقت مادھوری کے فلمی پس منظر سے واقف نہیں تھے؟
ڈاکٹر نینے نے بتایا کہ وہ اس وقت لاس اینجلس میں رہتے تھے، ہندی نہیں بولتے تھے اور نہ ہی ہندی فلمیں دیکھتے تھے۔ ان کی دلچسپی زیادہ تر ہالی ووڈ کی فلموں میں تھی۔ ان کے مطابق اسٹیون اسپیلبرگ اور جارج لوکاس کی فلمیں دیکھتے ہوئے ان کی پرورش ہوئی، جبکہ ’اسٹار وارز‘ بھی ان کی پسندیدہ فلمی دنیا کا حصہ تھی۔
انہوں نے بتایا کہ مادھوری سے ملاقات کے بعد دونوں نے تقریباً تین ماہ ایک دوسرے کو سمجھنے میں گزارے۔ اس دوران ان کے درمیان اچھی ہم آہنگی پیدا ہوئی، جس کے بعد انہوں نے مادھوری کو شادی کی پیشکش کردی۔
فرح خان نے کہا کہ مادھوری ڈکشٹ اور ڈاکٹر شری رام نینے کی شادی کی خبر بالی ووڈ میں خاصی توجہ کا مرکز بنی تھی اور اس خبر نے اداکارہ کے کئی مداحوں کو بھی حیران کردیا تھا۔