پختونخوا میں ایمرجنسی کے بعد مخصوص اضلاع کیلیے ایڈمنسٹریٹر تعینات، اعلامیہ جاری

پشاور: خیبرپختونخوا میں گورنر راج اور ایمرجنسی کے نفاذ کے بعد وفاقی حکومت نے مخصوص 12 اضلاع کے انتظامی امور کی نگرانی کے لیے گریڈ 20 کے افسر محمد یحییٰ اخونزادہ کو ایڈمنسٹریٹر تعینات کر دیا ہے۔

جاری اعلامیے کے مطابق محمد یحییٰ اخونزادہ وفاقی حکومت کی ہدایات کے تحت ان 12 اضلاع کے انتظامی معاملات دیکھیں گے۔ ان کی خدمات سول سرونٹس ایکٹ 1973 کی دفعہ 10 کے تحت خیبرپختونخوا حکومت کے سپرد کی گئی ہیں، جبکہ تعیناتی تاحکمِ ثانی مؤثر رہے گی۔

محمد یحییٰ اخونزادہ اس سے قبل وزیراعظم آفس میں ایڈیشنل سیکریٹری کے عہدے پر خدمات انجام دے رہے تھے۔ ان کا تعلق چارسدہ سے ہے۔

وہ ماضی میں جنوبی اور شمالی وزیرستان میں ایڈیشنل پولیٹیکل ایجنٹ کے علاوہ خیبرپختونخوا کے محکموں صحت، اطلاعات اور تعلیم میں سیکریٹری اور کمشنر ڈیرہ اسماعیل خان بھی رہ چکے ہیں۔

واضح رہے کہ وفاقی کابینہ کی منظوری اور صدر مملکت کے دستخط کے بعد خیبرپختونخوا میں گورنر راج اور ایمرجنسی نافذ کیے جانے کے بعد یہ انتظامی تعیناتی عمل میں آئی ہے۔