مہنگائی کے ستائے عوام پر بجلی کا نیا بوجھ، فی یونٹ قیمت بڑھ گئی

اسلام آباد: مہنگائی سے پریشان عوام کے لیے ایک اور بری خبر سامنے آگئی، نیپرا نے بجلی کی قیمت میں ایک روپے 11 پیسے فی یونٹ اضافہ کردیا۔

نیشنل الیکٹرک پاور ریگولیٹری اتھارٹی (نیپرا) کی جانب سے جاری نوٹیفکیشن کے مطابق بجلی کی قیمت میں اضافہ اگست کی ماہانہ فیول پرائس ایڈجسٹمنٹ کی مد میں کیا گیا ہے، جس کا اطلاق صرف ایک ماہ کے لیے ہوگا۔

نوٹیفکیشن کے مطابق اضافی رقم ملک بھر کے بجلی صارفین سے اکتوبر کے ماہانہ بجلی بلوں کے ذریعے وصول کی جائے گی۔

ذرائع کے مطابق اگست کی فیول پرائس ایڈجسٹمنٹ کے تحت بجلی مہنگی ہونے سے صارفین پر مجموعی طور پر 19 ارب روپے کا اضافی مالی بوجھ پڑے گا۔

نیپرا کے مطابق لائف لائن صارفین کو ایک روپے 11 پیسے فی یونٹ اضافے سے مستثنیٰ قرار دیا گیا ہے، اس لیے ان صارفین پر قیمت میں اضافے کا اطلاق نہیں ہوگا۔