محکمہ مال کے زیرِ التواء کیسز ترجیحی بنیادوں پر نمٹائے جائیں، احمد زیب

لورالائی(میاں محمدعامربشیر آرائیں )اسسٹنٹ کمشنر لورالائی احمد زیب کی زیرِ صدارت تحصیلدار اور پٹواریوں کا ایک اہم اجلاس منعقد ہوا، جس میں محکمہ مال سے متعلق مختلف امور، ریونیو معاملات، سرکاری ریکارڈ کی تکمیل و درستگی، زیرِ التواء کیسز، عوامی شکایات اور شہریوں کو ریونیو خدمات کی فراہمی کا تفصیلی جائزہ لیا گیا۔اجلاس میں محکمہ مال کے افسران اور متعلقہ اہلکاروں نے شرکت کی اور اپنے اپنے دائرہ کار سے متعلق امور سے اسسٹنٹ کمشنر کو آگاہ کیا۔ اس موقع پر ریونیو ریکارڈ کی موجودہ صورتحال، زیرِ التواء معاملات اور عوام کو درپیش مشکلات پر تفصیلی غور کیا گیا جبکہ مختلف مسائل کے حل کے لیے ضروری اقدامات اور حکمتِ عملی پر بھی تبادلہ خیال کیا گیا۔
اسسٹنٹ کمشنر لورالائی احمد زیب نے اجلاس سے خطاب کرتے ہوئے کہا کہ محکمہ مال براہِ راست عوامی معاملات سے منسلک اہم محکمہ ہے، اس لیے یہاں کام کرنے والے افسران اور اہلکاروں کی ذمہ داریاں انتہائی اہمیت کی حامل ہیں۔ انہوں نے ہدایت کی کہ عوام کو ریونیو سے متعلق امور میں ہر ممکن سہولت فراہم کی جائے اور شہریوں کی درخواستوں، شکایات اور مسائل کو بلاوجہ التواء میں نہ رکھا جائے۔
انہوں نے کہا کہ اراضی اور ریونیو سے متعلق معاملات میں شفافیت، میرٹ اور قواعد و ضوابط کی مکمل پابندی کو یقینی بنایا جائے۔ پٹواری حضرات اپنے متعلقہ علاقوں کا ریکارڈ باقاعدگی سے اپ ڈیٹ رکھیں اور سرکاری دستاویزات کی تکمیل میں کسی قسم کی غفلت یا غیر ضروری تاخیر سے گریز کریں۔
اسسٹنٹ کمشنر احمد زیب نے مزید کہا کہ سرکاری ریکارڈ کسی بھی علاقے کے انتظامی اور ریونیو نظام میں بنیادی حیثیت رکھتا ہے، اس لیے ریکارڈ کی درستگی اور حفاظت پر خصوصی توجہ دی جائے۔ انہوں نے تحصیلدار اور پٹواریوں کو ہدایت کی کہ زیرِ التواء کیسز کا باقاعدگی سے جائزہ لے کر انہیں ترجیحی بنیادوں پر نمٹایا جائے اور عوام کو بار بار دفاتر کے چکر لگانے سے بچانے کے لیے مؤثر اقدامات کیے جائیں۔اجلاس میں عوامی شکایات کے بروقت ازالے پر بھی خصوصی زور دیا گیا۔ اسسٹنٹ کمشنر نے کہا کہ عوامی خدمت سرکاری افسران اور اہلکاروں کی بنیادی ذمہ داری ہے اور شہریوں کے ساتھ خوش اخلاقی، تعاون اور احترام سے پیش آنا انتظامی امور کا لازمی حصہ ہے۔ انہوں نے واضح کیا کہ کسی بھی شہری کو اس کے جائز حق کے حصول میں غیر ضروری رکاوٹ یا تاخیر کا سامنا نہیں ہونا چاہیے۔
اس موقع پر اسسٹنٹ کمشنر میختر اسرار احمد بھی اجلاس میں شریک ہوئے۔ انہوں نے محکمہ مال سے متعلق امور، ریونیو معاملات اور عوام کو درپیش مسائل کے حوالے سے اپنی تجاویز پیش کیں۔ انہوں نے متعلقہ اہلکاروں کے درمیان مؤثر رابطہ کاری، ریکارڈ کی بروقت تکمیل اور عوامی مسائل کے فوری حل کے لیے باہمی تعاون کو مزید بہتر بنانے کی ضرورت پر زور دیا۔
اجلاس کے دوران افسران و اہلکاروں کو اپنی ذمہ داریاں ایمانداری، شفافیت، فرض شناسی اور بہتر انتظامی انداز میں انجام دینے کی ہدایات بھی جاری کی گئیں۔ اسسٹنٹ کمشنر نے کہا کہ محکمہ مال کے معاملات میں شفافیت کو ہر صورت برقرار رکھا جائے اور تمام امور مقررہ قوانین اور ضابطوں کے مطابق انجام دیے جائیں۔انہوں نے تحصیلدار اور پٹواریوں کو ہدایت کی کہ وہ اپنے اپنے علاقوں میں عوام سے مسلسل رابطے میں رہیں، ان کے مسائل سنیں اور قابلِ حل معاملات کو بروقت نمٹانے کے لیے عملی اقدامات کریں۔ انہوں نے کہا کہ بہتر ریونیو انتظام نہ صرف عوامی مشکلات میں کمی کا باعث بنتا ہے بلکہ اس سے انتظامی نظام پر عوام کا اعتماد بھی مضبوط ہوتا ہے۔اجلاس کے اختتام پر محکمہ مال کی کارکردگی کو مزید مؤثر بنانے، زیرِ التواء معاملات کو جلد نمٹانے، سرکاری ریکارڈ کو درست اور مکمل رکھنے اور عوام کو بروقت ریونیو سہولیات فراہم کرنے کے عزم کا اظہار کیا گیا۔