پانی کو ہتھیار یا سیاسی دباؤ کے ذرائع کے طور پر استعمال نہیں کیا جانا چاہیے، صدر مملکت

اسلام آباد: صدر مملکت آصف علی زرداری نے اقوام متحدہ کے سیکریٹری جنرل انتونیو گوتریس کو پاکستان کے اعلیٰ قومی اعزاز ’’نشانِ امتیاز‘‘ سے نواز دیا۔

تقریب میں وزیراعظم شہباز شریف، نائب وزیراعظم و وزیر خارجہ اسحاق ڈار اور اسپیکر قومی اسمبلی سمیت دیگر اہم شخصیات نے شرکت کی۔ انتونیو گوتریس نے قومی اعزاز سے نوازے جانے پر پاکستان کا شکریہ ادا کیا۔

صدر آصف علی زرداری نے اقوام متحدہ کے سیکریٹری جنرل سے ملاقات میں عالمی امن اور مذاکرات کے ذریعے تنازعات کے حل کے لیے ان کی کوششوں کو سراہا۔

تقریب سے خطاب کرتے ہوئے صدر مملکت نے کہا کہ پانی کو ہتھیار یا سیاسی دباؤ کے ذریعے کے طور پر استعمال نہیں کیا جانا چاہیے۔ پائیدار امن کے لیے دیرینہ تنازعات، بالخصوص جموں و کشمیر کے تنازعے کا حل ضروری ہے۔

آصف علی زرداری نے کہا کہ افغان سرزمین پاکستان یا کسی بھی دوسرے ملک کے خلاف استعمال نہیں ہونی چاہیے۔ علاقائی تنازعات کے حل کے لیے مذاکرات کا کوئی متبادل نہیں۔

صدر مملکت نے کہا کہ پاکستان فلسطینی عوام اور ان کے حقِ خودارادیت کی بھرپور حمایت جاری رکھے گا۔ انہوں نے کہا کہ پاکستان کو افغان سرزمین سے سرگرم دہشتگرد گروہوں کی جانب سے مسلسل دہشتگردی کا سامنا ہے۔