سکھر پولیس کی منشیات کے خلاف کارروائیاں، چرس اور شراب برآمد، 2 ملزمان گرفتار

سکھر(رپورٹ اسلم سومرو)ایس ایس پی سکھر احمد چوہدری پی ایس پی، کیو پی ایم کی ہدایت پر منشیات کے خلاف زیرو ٹالرنس پالیسی کے تحت سکھر پولیس کی کارروائیاں جاری ہیں۔ پولیس نے مختلف علاقوں میں کارروائی کرتے ہوئے چرس اور شراب سمیت دو ملزمان کو گرفتار کرلیا۔ پولیس ترجمان کے مطابق تھانہ کندرا کے ایس ایچ او نے دوران اسنیپ چیکنگ حدود میں کارروائی کرتے ہوئے ملزم اسلام شر کو گرفتار کیا۔ پولیس نے گرفتار ملزم کے قبضے سے ایک ہزار 40 گرام چرس برآمد کرنے کا دعویٰ کیا ہے۔ پولیس کے مطابق ملزم کے خلاف منشیات ایکٹ کے تحت مقدمہ درج کرکے مزید تفتیش شروع کردی گئی ہے۔ دوسری کارروائی تھانہ اے سیکشن کی حدود میں کی گئی، جہاں پولیس نے شراب کی بوتلوں سمیت ملزم اعجاز احمد کو گرفتار کرلیا۔ پولیس کے مطابق گرفتار ملزم کے قبضے سے شراب کی چار بوتلیں برآمد ہوئی ہیں۔ ملزم کے خلاف 3/4 ایکٹ کے تحت مقدمہ درج کرلیا گیا ہے۔ سکھر پولیس ترجمان کے مطابق منشیات کے خاتمے اور منشیات فروشوں کے خلاف کارروائیاں زیرو ٹالرنس پالیسی کے تحت جاری رکھی جائیں گی۔