کوئٹہ میں غیر رجسٹرڈ کھلے خشک دودھ کے خلاف کریک ڈاؤن، 5 دکانیں سیل، 6 افراد گرفتار

کوئٹہ: وزیراعلیٰ بلوچستان کے احکامات اور ڈپٹی کمشنر کوئٹہ مہراللہ بادینی کی ہدایات پر ضلعی انتظامیہ نے غیر رجسٹرڈ، غیر برانڈڈ اور کھلے خشک دودھ کی فروخت کے خلاف کارروائی کرتے ہوئے 5 دکانیں سیل اور 6 افراد کو گرفتار کرلیا۔

انتظامیہ کے مطابق سرکی روڈ، نواں اڈہ اور بڑیچ مارکیٹ میں کارروائیاں کی گئیں، جہاں بچوں کے لیے غیر رجسٹرڈ اور غیر برانڈڈ کھلے خشک دودھ کی فروخت کی جارہی تھی۔

کارروائیاں اسسٹنٹ کمشنر سریاب مصور احمد اچکزئی، اسپیشل مجسٹریٹس اعجاز حسین کھوسہ اور عزت اللہ نے بلوچستان فوڈ اتھارٹی کے ہمراہ انجام دیں۔

ضلعی انتظامیہ نے واضح کیا ہے کہ غیر رجسٹرڈ اور غیر برانڈڈ خشک دودھ کی فروخت کے خلاف کارروائیاں جاری رہیں گی اور قوانین کی خلاف ورزی کرنے والوں کے خلاف کارروائی عمل میں لائی جائے گی۔